Related Posts
Category : Gujarat
Ambaji: યાત્રાધામમાં રોડ પરના નડતરરૂપ દબાણોનો સફાયો
યાત્રાધામ અંબાજી હાલમાં પરિવર્તનના દૌરમાંથી પસાર થઈ રહ્યું છે. અંબાજી મંદિરને વિશ્વકક્ષાનું ભવ્ય સ્વરૂપ આપવા માટે ‘શક્તિ કોરિડોર’નું નિર્માણ કાર્ય પૂરજોશમાં ચાલી રહ્યું છે. આ બાંધકામને કારણે અંબાજીના આજુબાજુના મુખ્ય હાઈવે અને આંતરિક રસ્તાઓ પર વ્યાપક ડાયવર્ઝન આપવામાં આવ્યા છે. જોકે, ડાયવર્ઝનવાળા રસ્તાઓ પર પણ સ્થાનિક વેપારીઓ અને અન્ય તત્વો દ્વારા નડતરરૂપ ગેરકાયદેસર દબાણો ખડકી દેવાતા છેલ્લા કેટલાક સમયથી અસહ્ય ટ્રાફિક જામની સમસ્યા સર્જાતી હતી.
ગેટ નંબર 5, 6 અને 7 પાસે કડક કાર્યવાહી
શનિ-રવિ અને તહેવારોના દિવસોમાં માઈભક્તોની ભારે ભીડ ઉમટતી હોવાથી આ ટ્રાફિક વ્યવસ્થા સદંતર ખોરવાઈ જતી હતી. આ ગંભીર બાબતને ધ્યાને લઈને અંબાજી મંદિર પ્રશાસન, સ્થાનિક ગ્રામ પંચાયત/નગરપાલિકા અને પોલીસ વિભાગ દ્વારા સંયુક્ત માસ્ટર પ્લાન તૈયાર કરવામાં આવ્યો હતો. વહેલી સવારે મોટા કાફલા સાથે તંત્રની ટીમો અંબાજીના સંવેદનશીલ ગણાતા મંદિર ગેટ નંબર ૫, ૬ અને ૭ ની આસપાસ ત્રાટકી હતી. રસ્તાની બંને બાજુએ ફૂટપાથ પર કબજો જમાવીને બેસેલા લારી-ગલ્લા અને પાકા શેડને હટાવી દેવામાં આવ્યા હતા. વેપારીઓ સાથે કોઈ ઘર્ષણ ન થાય તે માટે ઉચ્ચ પોલીસ અધિકારીઓ પણ સ્થળ પર હાજર રહ્યા હતા.
યાત્રાળુઓ અને સ્થાનિક વાહનચાલકોએ નિર્ણયને વધાવ્યો
દબાણ હટાવવાની આ કડક ઝુંબેશના કારણે હવે અંબાજીના મુખ્ય પ્રવેશદ્વારો અને ડાયવર્ઝન માર્ગો એકદમ ખુલ્લા અને સુઘડ દેખાઈ રહ્યા છે. વહીવટી તંત્રના અધિકારીઓના જણાવ્યા મુજબ, આગામી દિવસોમાં આ વિસ્તારોમાં કોઈ ફરીથી દબાણ ન કરે તે માટે સ્પેશિયલ સ્ક્વોડ તહેનાત કરવામાં આવશે અને ટ્રાફિક પોલીસ પોઈન્ટ્સની સંખ્યા વધારવામાં આવશે. આ સુધારાથી અંબાજી આવતા અબાલ-વૃદ્ધ તમામ શ્રદ્ધાળુઓની દર્શન યાત્રા વધુ સુગમ અને સરળ બનશે, જેથી મુસાફરો અને સ્થાનિક નાગરિકોએ તંત્રની આ કામગીરીની પ્રશંસા કરી છે.
Load more
